رواية يكفيني حبك كاملة بقلم نوري

تزورني بكرا هي ونانسي
_ اهلا وسهلا ينوروا 
لو مش حابة وجودهم ممكن تروحي...
_ ريح نفسك عشان أنا مش هروح في حتة واسيبك لوحدك مع العقربة بنت عمتك
اية خاېفة لحسن تحلى في عيني واتجوزها واطلع واطي زي ما قالولك وحذروكي
_ انت ليه بتفكرني كل شوية باللي فات مش قادر تنسى ليه
عشان مفيش حاجة هتنسيني اللي عملتيه
_ ليه غلطة وحصلت وندمانة عليها وبحاول اعوضك عنها اعمل اية تاني
صوتها وطي وغلب عليه البكا
_ ليه مش عايز تسامحني على اللي فات ونبدأ من جديد يا قصي انا بحبك
ومش هقدر ابعد عنك وانت عارف كدا ليه لسة بتعاملني بجفا وقسۏة بالشكل دا
قربت مني ومسكت ايدي وحطت كفها التاني على وشي
_ تعالى ننسى اللي فات ونفتح صفحة جديدة مع بعض عشان خاطري ساكت ليه قول اي حاجة متموتنيش بالبطيئ ارجوك
خلصتي
بعدت عنها وسحبت أيدي منها
تكوني موجودة بكرا أو متكونيش مش فارقلي براحتك وياريت بقا تبطلي قول ننسى ونفتح صفحة جديدة والكلام اللي ملوش لازمة دا عشان مش هيحصل أبدا عشان أنا مش هكرر الغلط مرتين
تاني يوم صحيت على ريحة بخور كانت ريحة هادية وجميلة غير باقي روايح البخور القوية فتحت باب اوضة الاطفال اللي بقيت انام فيها من ساعة ما خفيت وبقيت بعرف اتحرك لقيت الشقة متنضفة ومترتبة زيادة عن كل يوم وريحة البخور بتفوح منها سمعت صوت كركبة في المطبخ دخلت لقيتها قاعدة على الترابيزة وقدامها كعادة اي بيت مصري في عزومة جميع انواع المحشي حست بيا ف بصتلي وبعدها التفتت للي بتعمله
_ استنى في الصالة وخمس دقايق وهتلاقي الفطار
كانت دي الجملة الوحيدة اللي وجهتها ليا ومن بعدها متكلمتش تاني فضلت طول اليوم جوا المطبخ ومخرجتش منه من وقت للتاني كنت بدخل اشوفها من غير ما تحس أو اعمل نفسي بجيب حاجة كان باين عليها الإرهاق اوي اكتر من اي مرة وحسيت أنها بتسند نفسها بالعافية ودا كان قالقني عليها لكني حاولت اتماسك عدى الوقت بسرعة وجت عمتي سلمت عليها وعلى نانسي اللي كانت عينيها بتطلع قلوب كالعادة
اذيك يا قصي
بخير اذيك انتي
بخير طول ما انت بخير
احم اتفضلي اتفضلي يا عمتو
واضح انها بداية مشرقة بالتفاؤل دخلوا وكانت فرح بتجهز السفرة اتفاجأت بيهم وبصت لهدومها اللي ملحقتش تغيرها بأحراج وقربت تسلم عليهم
_ اذي حضرتك يا طنط
اهلا يا حببتي 
_ اذيك يا نانسي
رجعي ايدك مطرحها يا حببتي اكيد مش هسلم عليكي وانتي بالمنظر دا اية معندكيش زوق خالص مش عارفة إن في ناس جاية
نانسي
شخطت فيها وبصتلها بتحذير بسبب قلة زوقها اللي دايما بتتكلم بيها معاها كل ما تشوفها
ااا..انا مش قصدي يا قصي انا بس بقول...
خلاص اتفضلي يا عمتو اقعدي عن اذنكم ثواني
اخدتها من أيدها ودخلنا الاوضة
غيري هدومك براحتك وانا هستناكي في الاوضة التانية عشان نطلع سوا
هزتلي راسها واتجهت ناحية الدولاب نقت عباية استقبال كانت مجهزاها خرجت استناها برا ولما خلصت طلعنا سوا قعدنا على السفرة سوا وكنا بنتعامل طبيعي قدامهم
كلي يا عمتو مش بتاكلي ليه
باكل يا حبيبي تسلم
هو انت مسمي دا أكل الله يكون في عونك بصراحة مش عارفة بتاكل من ايديها كل يوم ازاي
رميت المعلقة من ايدي بعصبية ف عملت صوت رفعت عيني ابصلها لقيتها انكمشت في نفسها
معلش يا قصي هي نانسي
متقصدش بس معلش يا بنتي متزعليش منها
اللي غلط يعتذر يا عمتي ولا اية
ااا..اة عندك حق اعتذري من فرح يا نانسي
_ خلاص يا قصي محصلش حاجة
فرررح
بصيتلها بحدة ف سكتت الټفت لنانسي ولاحظت مسكة ايديها للمعلقة بغل بصت لفرح بنفس النظرة ومش هاين عليها تنطق
اعتذري
متأسفة 
_ محصلش حاجة
عدى الموقف وخلصنا أكل القاعدة كانت لطيفة نوعا ما لكنها تقيلة في نفس الوقت بسبب نظراتها لفرح اللي مكنتش عجباني خالص مشيوا وجالي تليفون من واحد زميلي في الشغل ف سيبتها ودخلت البلكونة اتكلم
يعني اية يا ادهم اللي بتقوله دا
صدقني دا اللي قاله صاحب الشركة هو مش عاجبه غيابك كل دا
وانا يعني كنت غايب بمزاجي منا كنت عامل حاډثة ومتجبس يا اخي وبعدين هو مش المدير قال إني ارجع في اي وقت بعد ما اخف
المدير ملوش كلمة بعد صاحب الشركة يا قصي ما انت عارف هو اة قالك كدا لكن أ. رأفت رفض إنك ترجع وقال إن طالما في بديل ليك خلاص
طب والمرتب بتاعي اللي عندهم
للأسف مش هيصرفولك حاجة 
هياكلوا حقي يعني تمام وربي ما هسكت وهطربقها على دماغهم
قفلت معاه ورميت التليفون على الأرض بعصبية كل حاجة مقفولة في وشي هعمل اية ولا هلاقي شغل ازاي في اسرع وقت مش معايا ولا مليم كل اللي معايا واللي كنت محوشه اتصرف في الكام شهر اللي قعدتهم من بعد الحاډثة يارب ساعدني يارب
_ مالك يا قصي
دخلت فجأة وهي مخضۏضة كنت قاعد على الأرض وحاطط راسي بين ايديا قعدت جمبي وحطت أيدها على كتفي
مالك اية اللي حصل
.....
_ رد عليا طمني اية اللي مقعدك كدا وليه كنت بتزعق حصل حاجة طيب
رفعت راسي وبصيتلها كانت بتتكلم وانا مش سامعها كل اللي كنت مركز فيه هو مصيرها معايا ليه اخليها تعاني تاني وادخلها في دوامة قلة الفلوس وإن مفيش شغل كفاية الشهور اللي فاتت واللي شافته مني
_ حبيبي انت سامعني
لمي هدومك عشان هوديكي عند أهلك
وقفت وكنت هخرج لقيتها مسكت أيدي
_ عشان خاطري متعملش فيا كدا انا..انا مش هعمل اي حاجة تزعلك تاني والله بس متبعدنيش عنك عشان خاطري يا قصي متعملش فيا كدا عشان خاطري
عيطت وفضلت

ماسكة فيا بأيديها الاتنين رافضة تسيبني أو اتحرك مسكت نفسي ومطلعهاش منه مسكت ايديها بعدتها عني ولفيت اديها ضهري عشان مضعفش قدام عيونها
سمعتي انا قولت اية لمي هدومك انا مش فاضي لدلعك دا
_ انا مش عايزة امشي
وانا عايزك تمشي ومشوفكيش تاني قدامي
_ مش هبقى مرتاحة وانت بعيد عني
وانا راحتي في بعدك
لحظة .. اتنين .. باب الشقة اتفتح واتقفل لفيت بسرعة ملقتهاش قدامي مكنتش مستوعب اللي حصل نزلت جري وراها لقيتها شبه بتجري وعمالة تمسح في دموعها قلقت عليها وهي في الحالة دي مشيت وراها براحة من غير ما تحس لحد ما اطمنت انها طلعت بيتهم رجعت البيت مهموم وحزين على حالنا الشقة رجعت فاضية تاني خالية من صوتها وحركاتها وضحكتها اللي كانت مالياه حتى في الفترة اللي فاتت رغم معاملتي ليها كنت بغير كل ما اشوفها بتضحك مع ياسين ودا كان بيخليني اتعصب واعاملها بأسلوب وحش كنت عارف انها لما تمشي كل الذكريات هتيجي في بالي فجأة وهعاني بس مكنتش اعرف اني هعاني في ساعتها كدا دخلت الأوضة انام لكن صورتها مكنتش بتفارق بالي وفضلت على كدا للصبح
مر كام يوم على بعدنا وطول الايام دي كنت مفتقدها اكتر من اي وقت فات روحت للمأذون عشان أطلقها لكن مقدرتش كنت فاكر إن قلبي بس هو اللي هيبقى رافض لكن لساني وعقلي كمان كانو رافضين ينطقوها ويستوعبوا فكرة أنها خلاص مش هتبقى معايا تاني روحت البيت ودخلت الأوضة اللي كانت بتنام فيها أول حاجة قابلتني كانت ريحتها مالية الأوضة وماسكة فيها وكأن كل حاجة ضدي في قرار البعد قعدت على السرير وانا مشوش لفت نظري صندوق على الكومود اول مرة اشوفه فتحته ولقيت فيه كل صورنا كل صورة اتصورناها وكل جواب بعتهولها لقيته فيه مسكت صورة كانت بتجمعنا في عيد ميلادها اللي فات عيونها في عيوني بتضحك وفرحتها مكنتش سيعاها يومها عشان عملتلها مفاجأة وجمعتلها كل اللي بتحبهم دموعي نزلت وانا بفتكر ابتسامتها ليا اخر اليوم خليتني احس اني بملك الدنيا وما عليها
يا عيني ليه بتدمعي
ما حبيبنا سابنا خلاص وراح
دلوقتي نفسك ترجعي
ومستعدة تنسي الجراح 
مسكت صورة تانية كانت في جاردن سيتي مكانها المفضل للتمشية وخصوصا بليل نطت في دماغها الساعة 1 بليل ننزل نتمشى هناك ونجيب ايس كريم وطبعا وافقتها ومرفضتش هي بس تشاور وانا انفذ ملست على صورتها ودموعي زادت حقيقي وحشتني اوي
ليه كدا يا عيني
من تاني يوم في فراقنا
انا وانتي ليه اشتقنا
مش كنا قولنا وداع مش كنا خلاص فارقنا
دلوقتي اية غيرنا
ع البعد ليه ما قدرنا
من تاني يوم انا وانتي رجعنا ليه في كلامنا 
يتبع...
كنت قاعدة في بلكونة اوضتي اللي مخرجتش منها من ساعة ما جيت مبعملش حاجة غير اني قاعدة ببص على اول الشارع يمكن الاقيه داخل منه وجايلي اصل مش معقول يكون سابني بجد مهونش عليه لا مهونش على قلبه بس..بس هو قالي أنه مبقاش عايزني ولا عايز يشوفني تاني 
عيطت عيطت كتير اوي اكتر من اي مرة فاتت كل ما افتكر كلامه بعيط واتحسر على ايامي معاه كنت غبية وضيعته بأيدي ضيعت احلى حاجة في حياتي وأغلاهم
انتي لسة يا بنتي قاعدة زي ما انتي
_ مستنياه
قعدت جمبي وسكتت كنت عارفة أنها مش لاقية حاجة تقولها أصلها هتقول اية وهي شيفاني عندي أمل أنه ييجي ويرجعني من تاني بعد ما جيتلها من يومين معيطة وبقولها أنه هيطلقني وإني خلاص خسرته بس انا معنديش حل تاني معنديش حل غير إني اثق في ربي إنه هيرجعهولي بصيت للسما ودعيت ربنا في سري
يارب .. يارب رجعهولي تاني أجبر بخاطري واربط على قلبي ورجعهولي يارب 
كفاياكي عياط يا حببتي انا قلبي بيتقطع عليكي
_ مش قادرة يا ماما مش قادرة استوعب فكرة إنه ممكن منرجعش تاني
خدتني ومسحت على شعري
انا مش هلومك عشان انتي مش ناقصة وعشان انتي عرفتي غلطك واكيد اتعلمتي الدرس
_ درس قاسې اوي 
كان لازم عشان تتعلمي قومي .. قومي صلي ركعتين لله يريحوا قلبك وادعي ربنا يرده ليكي تاني في اقرب وقت يلا تعالي
قومت معاها وخرجت برا عشان اتوضى
فرح
انتي كويسة متقلقنيش عليكي عشان خاطري
_ متقلقيش انا بخير الحمد لله
بخير ازاي وانتي دموعك منشفتش من ساعة ما جيتي
خلاص يا رقية سيبي اختك متضغطيش عليها
سابتني وهي قلقانة عليا ف ابتسمتلها عشان اطمنها شوية اتوضيت وفرشت السجادة عشان أصلي في كل سجدة كانت دعوتي ثابتة مفيش غيرها انا واثقة في ربنا حاشاه إنه يخذلني خلصت صلاة وفردت جسمي على السجادة نمت مكاني ومحسيتش بنفسي غير تاني يوم الصبح سمعت خبط على الباب وماما بتنده من برا قومت وانا بتوجع من نومتي على الأرض وفتحت الباب
صح النوم اية دا كله دحنا بقينا العصر
_ محسيتش بنفسي خالص معرفش نمت ازاي
الحمد لله دا انتي بقالك يومين مبتناميش ساعتين على بعض ركعتين القيام ريحوكي صح
_ الحمد لله حاسة إن في عبئ اتشال من على قلبي
يارب دايما مرتاحة يا عيوني انا نازلة شوية لطنتك سميرة اقعد معاها عشان طلبتني اساعدها في عزومة أهل خطيب بنتها بكرا إن شاء الله ورقية راحت درسها وهترجع كمان ساعتين انا حضرتلك الفطار جوا عشان خاطري افطري كويس ومتطنشيش خلي وشك يرجع ترد فيه الدموية من تاني
_ حاضر متقلقيش
بصيتلي بشك ف ابتسمت
_ هفطر والله مش هطنش
انا كدا اطمنت يلا سلام اة صحيح لو هتعملي شاي متفتحيش العين اللي على اليمين عشان بتسرب لحد ما اجيب حد يصلحها 
_ حاضر
نزلت ودخلت غسلت وشي وغيرت هدومي لقيتها محضرالي الفطار فعلا على السفرة قعدت كلت وانا بڠصب على نفسي عشان متزعلش مني حسيت اني مصدعة ف قومت اعمل كوباية شاي مسكت الكبريت و وقفت بحاول افتكر اللي قالته
_ هي قالت مفتحش انهي عين
مكنتش فاكرة هي قالت على انهي ف فتحت واحدة واحدة فيهم اشوف انهي اللي بتسرب ولقيتها سمعت صوت خبط في البلكونة ف طلعت اشوف في اية لقيت علبة الماية اللي بتحطها ماما لأي طير معدي واقعة على الارض جبت قماشة ومسحتها و بصيت على الزرع لقيته محتاج يتسقي غيبت شوية عقبال ما خلصت وجيت ادخل المطبخ شميت ريحة غاز كانت قوية جدا جواه وابتدت تخرج لبرا جريت على البوتاجاز اقفله وانا مش عارفه اتنفس جيت افتح الشباك معرفتش والريحة عمالة تزيد حواليا خرجت الصالة وحاولت اخد نفسي لكن معرفتش حسيت بخنقة وابتديت ادوخ وفجأة كل حاجة اسودت قدامي
كنت قاعد على اللاب بدور على شغل وببعت لشركات كتير ال بتاعي لعل وعسى شركة تقبلني جرس الشقة رن قومت فتحت وكان ياسين
اية يا عم كل دا عشان تفتح
دا على أساس انك بقالك قرن بترن الجرس
انت كمان عايز توقفني قرن
خش عشان ممدش أيدي عليك
لا خلاص قلبك ابيض
دخلنا لجوا لقيته بيطلع علب اكل من الشنطة
انا قولت بقا استأذن من الشغل النهاردة واجي نتغدى سوا
اصيل طمرت فيك تربيتي
والله
في اعتراض ولا حاجة
لا طبعا يا كبير ااا..بقولك اية انا وحشتني شقتنا اوي ف هروح اقعد فيها تاني بقا و..وانت بقا اجر الشقة دي احسن بدل ما تكون فاضية
عايز تمشي عشان الشقة وحشتك ولا عشان تسيبلي دي أجرها وواعيش منها
صدقني انا مش مرتاح وانت كدا مش هقدر اقعد فيها وانا عارف انها ممكن تحل ازمتك
طبطبت على ايده وابتسمتله
متشيلش همي انا هعرف اتصرف
مشيلش همك ازاي بس انا مليش من بعد ربنا غيرك وبعدين انت ناوي ترجع فرح امتى بقا
اية اللي جاب سيرة فرح دلوقتي
عشان لا شايفك مرتاح ولا مبسوط وهي بعيدة عنك ليه بټعذب نفسك طيب بالشكل دا
انت مش فاهم حاجة يا ياسين
طب فهمني قولي اية اللي حصل خلاكم وصلتوا لكدا
مكنتش عارف اقوله اية اكيد مش هحكيله واشوه صورتها قدامه تليفوني رن بأسم مامتها استغربت وفكرت أنها بتتصل عشان
وضعنا فتحت وحطيته على ودني لقيتها بتصرخ
الحقني يا قصي .. الحقني يا ابني فرح مبتنطقش
اټرعبت واخدت مفتاح العربية وجريت على تحت مردتش على ياسين اللي كان بينادي عليا ومخضوض كل اللي هاممني اوصلها وبس في ظرف دقيقة كنت تحت بيتهم وطلعت اجري على السلم وانا برتجف سامع صوت عياط مامتها من تحت ودا رعبني اكتر وصلت لشقتهم ودخلت لقيتها مرمية على الأرض ومامتها والجيران حواليا بيحاولوا يفوقوها اتجمدت مكاني وانا شايفها بالمنظر دا قربت منها وطلبت من مامتها تجيب عباية نحطها عليها جابتها ولبستهالها واخدتها ونزلت بيها وهي ورايا لقيت ياسين في وشي ومن غير ما يسأل اخد مفتاح العربية يسوق هو وصلنا المستشفى دخلت وانا شايلها وپصرخ فيهم إن حد ينقذها اخدوها على الترولي بسرعة ودخلوها الطوارئ جيت ادخل الأوضة معاها رفضوا
هو اية اللي ممنوع دي مراتي انا لازم ادخل معاها
يا أستاذ لو سمحت مينفعش كدا سيبنا نلحقها
قصي اهدى سيبهم يشوفوا اية اللي فيها
شيلت ايده اللي كان ماسكني بيها والټفت لمامتها
حصلها اية
مش عارفة مش عارفة أنا مكنتش معاها ولما طلعت لقيت الشقة كلها ريحتها غاز وهي يا حبة عيني مرمية على الأرض قاطعة النفس
خرجت ممرضة من جوا سألت اية اللي حصل و والدتها قالتلها
كلمة خاېف أو مړعوپ دي قليلة اوي على اللي حاسس بيه كلامها اخر مرة بيتردد في ودني
خليك عارف أنه مفيش حاجة ممكن تفرقنا غير اني مكنش موجودة في الدنيا دي 
لا لا يارب متاخدهاش مني يارب عشان خاطري انا مش هستحمل بعدها مش هستحمل اعيش من غيرها يارب ردها ليا سالمة يارب
كل دقيقة كانت بتمر عليا كأنها سنة رايح جاي وكل شوية احاول ادخل ليها ويمنعونيمامتها كانت قاعدة مش مبطلة عياط عليها مكنتش قادر اسمع صوت عياطها مش قادر ولا عايز اسمع اي حاجة غير إنها بقت بخير وبس خرجوا الممرضات والدكتورة من عندها وقفت قدامها وخاېف من اللي هتقوله
هي بخير ص..صح
بخير الحمد لله متقلقوش احنا لحقناها بجهاز تنفس صناعي عشان نتخلص من الغاز اللي شمته وكمان معدل ضربات قلبها انتظم نوعا ما عن ما كانت جيالنا خالص وابتدت تفوق ف شوية وهتبقى بخير إن شاء الله
طب سيبوني اشوفها الله يخليكي
معلش يا أمي مش هينفع دلوقتي خالص حد يدخلها تخلص بس الممرضة معاها وتفوق تماما وتدخلوا تطمنوا عليها بعد اذنكم
دلوقتي بس عرفت اخد نفسي حطيت ايدي على قلبي اللي كان بيدق زي طبول الحړب حسيت إن رجلي مش شيلاني من الخضة ف قعدت على الأرض
قصي انت كويس
مكنتش عارف انطق بأي حاجة سندت راسي على كتفه وابتديت اخد نفسي تاني
قصي..
انا كويس كويس متقلقش
سيبته قومت ادور على المسجد اللي هنا لقيته ف دخلت اتوضى وأصلي ركعتين شكر لله أنها بخير فضلت احمد ربنا كتير إنه مكسرش بخاطري ورجعهالي سالمة كنت بعيط كل ما افتكر شكلها وهي مرمية على الأرض وقاطعة النفس انا مش بحبها انا بمۏت فيها ومقدرش استوعب فكرة أنها تروح مني خلصت صلاة وخرجت اروحلهم لقيت مامتها لسة قاعدة مكانها ف قربت قعدت جمبها
ممكن تهدي شوية انتي كدا هتتعبي
أهدى ازاي وانا شايفة بنتي بالمنظر دا
مش الدكتورة طمنتنا عليها خلاص هتكون كويسة صدقيني
انا بعيط على حالها ياقصي من اول مشكلتكم مع بعض وهي يا بټعيط يا تعبانة واديك شوفتها كانت عاملة ازاي الفترة اللي فاتت مش دي بنتي اللي كانت على طول بتضحك ومبسوطة
كل دا هينتهي صدقيني
هتطلقها مش كدا
ابتسمتلها وهزيت راسي بالرفض
لا مش هطلقها انا مقدرش استغنى عنها لحظة واحدة هي غلطت وانا غلطت ويمكن دا كان اختبار لعلاقتنا و لازم احنا الاتنين ننسى ونعدي عشان نكون سوا 
بجد يعني انت خلاص سامحتها
فرح حتة مني يا طنط غالية مهما عملت وزعلت منها برجع قصاد نظرة واحدة من عينيها وهي خلاص عرفت غلطها وندمت بجد وانا كمان عرفت غلطي واتعلمت الدرس ومستحيل اسمح أننا نبعد عن بعض تاني
ربنا يديمكم لبعض يا حبيبي ومتفترقوش أبدا ويبعد عنكم العين 
يارب يا طنط يارب
ماماااا
سمعنا صوت رقية ولقيناها جاية تجري علينا
ماما فرح مالها اية اللي حصلها
اهدي يا رقية اختك بخير الحمد لله
بخير ازاي انا الجيران قالولي أنها قاطعة النفس
لحقوها يا بنتي الحمد لله وشوية وهتفوق
الحمد لله يارب الحمد لله
مش عارفة هقول أية ل ابوكي لما ييجي من السفر النهاردة ويلاقيها كدا
هو عمي مسافر
ايوا مسافر في شغل والمفروض أنه قرب ييجي
يعني هو مكنش يعرف إن فرح جت عندكم
مرضيتش أقوله عشان ميتخضش عليها وييجي على ملى وشه
طب خلاص بسيطة روحوا انتو دلوقتي عشان لما ييجي يلاقيكوا وميشكش في حاجة وانا هفضل مع فرح لحد ما تفوق واخدها على بيتنا
لا طبعا ازاي هنسيبها وهي في الحالة دي
اختك كويسة والله صدقيني وانا هفضل معاها وهطمنكم بالتليفون كل شوية ولما تفوق هخليها تكلمكم كمان
لا مش هيهون عليا اسيبها
يا حبيبتي انا جمبها متقلقيش والله وهخليها تكلمكم لما تفوق 
طب..طب حتى اطمن عليها قبل ما امشي
قومت ندهت الممرضة وقولتلها تسمح لمامتها بس تطمن عليها دخلت شافتها و خرجت قالتلنا أنها كانت بتفوق وتنام تاني وصيت ياسين ياخد العربية ويوصلهم لحد البيت
بعد ساعتين كمان دخلت الدكتورة تكشف عليها
طمنيني يا دكتور
الحمد لله ضربات قلبها انتظمت بشكل طبيعي وبقت كويسة
يعني اقدر ادخل ليها دلوقتي
وتاخدها وتروح كمان
طب معلش سؤال والدتها لما دخلتلها قالت إنها كانت بتفوق وتنام تاني ف دا ليه
دي حالة اختناق بغاز سام يعني مش بسيطة ودي كدا كانت دوخة مش نايمة ولا حاجة وكل دا من أعراض استنشاقها للغاز وممكن كمان لما تروح تفضل حاسة بدوخة شوية وقيئ بس كل دا طبيعي وهي بخير ف متقلقش
شكرا جدا بجد مش عارف اقولك اية
دخلت ليها بسرعة وانا قلبي بيدق جامد فتحت الباب وشوفتها نايمة على السرير قربت قعدت جنبها عوضت فيه بعدنا عن بعض واشتياقي اللي كان عمال يزيد ليها يوم بعد يوم كنت متبت فيها جامد وحاولت امنع نفسي من اني اعيط انا كنت بكدب عليها وعلى نفسي لما قولتلها اني مش عايزها تاني في حياتي هي اصلا كل حياتي كانت ممكن تروح مني ومشوفهاش تاني وساعتها مكنتش هسامح نفسي أبدا على معاملتي وكلامي ليها كانت بتأن 
حقك عليا يا نور عيني حقك عليا وعلى قلبي
نيمتها تاني براحة وخرجت برا اطمن والدتها في التليفون لقيت ياسين قاعد قدام الباب واول ما شافني جيه عليا
عاملة اية دلوقتي
الحمد لله بقت احسن لسة بس دايخة ومش متزنة
الحمد لله كنا فين وبقينا فين طب اية تقدر تخرج دلوقتي
ايوا
طيب خدها واخرج وانا هدفع حساب المستشفى 
مش عارف اقولك اية يا ياسين
هتقول اية يا قصي دا انت اخويا الكبير وربنا يعلم معزة فرح عندي عاملة ازاي ربنا ما يحرمكم من بعض أبدا
امين
دخلت تاني عندها قعدتها براحة ولبستها العباية اللي كانت جاية بيها والطرحة شيلتها بين ايديا ف لقيتها حطت راسها على كتفي خدتها وطلعت بيها على العربية وساق بينا ياسين على البيت
دخلت بيها الأوضة وانا لسة شايلها وحطتها على السرير بشويش لأنها نامت في الطريق غطيتها وطلعت برا احاول اعملها حاجة تاكلها فتحت التلاجة ومكنتش عارف اطلع اية ولو طلعت حاجة هعملها ازاي قطع تفكيري صوت خبط على بابا الشقة كانت رقية جايبالها شوربة خضار وفراخ وجايبة اكل ليا على جنب دخلت اطمنت عليها وبعدين نزلت بسرعة عشان باباها 
فضلت نايمة كتير كأنها مش عايزة تصحى ولا تواجه اللي هي فيه فردت جسمي جنبها واخدتها يمكن تحس بوجودي جمبها وتفوق بعد فترة مش قليلة فاقت وابتدت تتحرك فتحت عينيها بشويش مرة واتنين لحد ما اتعودت على ضوء الاوضة واول حاجة قابلتها كنت أنا فضلت بصالي شوية وبعدين بصت حواليها بأستغرب ورجعت بصتلي تاني حاولت تقوم لكن مقدرتش ف قومتها وخليتها تسند ضهرها على شباك السرير
_ان..انا اية اللي جابني هنا
جيتي بيتك
_ بيتي
ايوا وهيفضل بيتك طول العمر
_ ط..طول العمر ازاي وانت مش عايزني جمبك
مقدرش والله دا انتي نور عيوني وكل دنيتي
عينيها دمعت و فضلت بصالي وهي مش مصدقة اللي بقوله
_ قصي متضحكش عليا الله يخليك
_ عشان خاطري قولي انك مش بتضحك عليا قول انك سامحتني وهتفضل معايا ومش هنبعد تاني 
والله العظيم ما هسيبك ولا هبعد عنك تاني هفضل معاكي لحد اخر نفس فيا
_ لا لا متقولش كدا بعيد الشړ عنك 
اهدي يا حبيبي اهدي
_ يعني انت خلاص سامحتني بجد
سامحتك يا حبيبي وانتي كمان حقك عليا عشان كلامي ومعاملتي ليكي
_ عارفة أنه كان ڠصب عنك ف مش زعلانة
طب يلا تعالي خدي دش يفوقك شوية وبعدها تكلمي مامتك عشان قلقانة عليكي
_ هو انا اصلا جيت هنا ازاي
هحكيلك بس تعالي خدي دش الأول عشان تفوقي
ساعدتها تاخد دش وسرحتلها بعدها شعرها ولمېته زي ما بتحبه كلمت مامتها وطمنتها عليها وبعدها جيبتلها الأكل وابتديت اكلها بأيدي كانت بصالي بطريقة استغربتها
مالك يا حبيبي
_ هو انت بجد مش